Sérsveit skipuð gegn hnífaglæpum

Átján ungmenni hafa fallið fyrir morðingjahendi í hnífaárásum í Lundúnaborg það sem af er þessu ári. Sextán ára piltur og tveir rúmlega tvítugir háskólanemar voru stungnir til bana í borginni í gær. Lundúnalögreglan hefur skipað sérsveit gegn hnífaglæpum í höfuðborginni.

Morðingjarnir munu jafnaldrar fórnarlambanna í flestum tilvikum. Gengjastríð og kynþáttafordómum er helst um að kenna.

Í gær var Shakilus Townsend sextán ára stunginn til bana þar sem hann var á gangi á götu í suð-austurhluta Lundúna. Vitni segja að fjögur eða fimm ungmenni, drengir og ein stúlka, á aldrinum fimmtán til nítján ára hafi ráðist á hann, barið og stungið. Vitni reyndu hvað þau gátu til að bjarga lífi stráksins en allt kom fyrir ekki. Hann kallaði á móður sína þar sem líf hans fjaraði út og sagðist ekki vilja deyja.

Á máundaginn var upprennandi leikari, Ben Kinsella, sextán ára, stunginn til bana í norðurhluta Lundúna. Systir hans, þekkt sápuóperuleikkona úr þáttunum Eastenders, sagði í viðtali að hann hefði aldrei átt í útistöðum við neinn og iðullega hjálpað til við góðgerðarstarf móður þeirra fyrir vegalausa unglinga.

Mörg hundruð Lundúnabúar gengu um götur borgarinnar til minningar um Kinsella og kröfðu borgaryfirvöld um aðgerðir.

Lundúnalögreglan tilkynnti í dag að sjötíu og fimm manna sérsveit gegn hnífaglæpum og gengjum hefði verið skipuð. Hún hafi umsjón með málmleitartækjum á samkomustöðum ungmenna í borginni og geti leitað fyrirvaralaust á ungu fólki leiki grunur á að það beri hníf