Ekki þarf að breyta stjórnarskránni vegna þjóðaratkvæðagreiðslu

Birkir Jón Jónsson, þingmaður Framsóknarflokksins, segir að ekki þurfi að breyta stjórnarskránni í tengslum við þjóðaratkvæðagreiðslu um það hvort hefja eigi aðildarviðræður við Evrópusambandið. Nóg sé að leggja fram þingsályktunartillögu á Alþingi um slíka kosningu og það hyggst hann gera þegar þing kemur saman í byrjun október.

Birkir skrifaði nýverið grein í Fréttablaðið ásamt Sæunni Stefánsdóttur, ritara Framsóknarflokksins, og Páli Magnússyni, bæjarritara í Kópavogi, þar sem þau hvetja til þess að efnt verði í seinsta lagi í maí á næsta ári til sérstakra kosninga um það hvort hefja eigi aðildarviðræður um inngöngu. Í framhaldinu fagnaði Jón Sigurðsson, fyrrverandi formaður flokksins, því sem hann kallaði tímabæru frumkvæði þremenninganna.

Nægjanlegt er að leggja til þingsályktunartillögu um þessa tilteknu atkvæðagreiðslu, að sögn Birkis. ,,Þeir löglærðu menn sem ég hef ráðfært mig við í þessu máli telja að það sé fullnægjandi að fara fram með þingsályktunartillögu í fyrra skrefinu."

Samþykki þjóðin að hefja aðildarviðræður um inngöngu í ESB segir Birkir ljóst að breyta þurfi stjórnarskránni þar sem sú ákvörðun snúi meðal annars að fullveldisafsali.

Aðspurður um viðbrögð við greininni segir Birkir að hann hafi fengið góð viðbrögð við henni og þá sérstaklega hjá yngri kynslóðinni í flokknum. ,,Þó að ágætir menn eins og Jón Sigurðsson og Jón Kristjánsson hafa ritað greinar svipaðs efnis þá finn ég fyrir vaxandi þunga hjá unga fólkinu í Framsóknarflokknum og öðrum flokkum að skoða þessi mál til hlýtar."

Birkir segist ekki vita hvort hann muni leggja þingsályktunartillöguna fram einn eða í samvinnu við þingmenn Framsóknarflokksins eða annarra flokka.