Jón fagnar hugmynd þremenninganna ólíkt Guðna

Jón Sigurðsson, fyrrverandi formaður Framsóknarflokksins, fagnar því sem hann kallar tímabært frumkvæði þriggja einstaklinga úr hópi yngri forystumanna flokksins varðandi hugmynd um þjóðaratkvæðagreiðslu um aðildarviðræður fyrir maí á næsta ári. Guðna Ágústssyni, núverandi formanni flokksins, hugnast hugmyndin lítt.

Sæunn Stefánsdóttir ritari Framsóknarflokksins og fyrrverandi þingmaður, Birkir Jón Jónsson þingmaður og Páll Magnússon bæjarritari Kópavogs og fyrrverandi aðstoðarmaður Valgerðar Sverrisdóttur hvetja í grein sem birtist í Fréttablaðinu í fyrradag til þess að efnt verði í seinsta lagi í maí á næsta ári til þjóðaratkvæðagreiðslu um það hvort Íslendingar eigi að hefja aðildarviðræður við Evrópusambandið.

Jón segir í grein í Fréttablaðinu í dag að besta leiðin til að ná almennu samkomulagi og sátt í Evrópumálum er að viðhafa tvöfalda þjóðaratkvæðagreiðslu. Þjóðin gengur þá fyrst til atkvæða um að leggja fram aðildarumsókn og ef samningar nást í samningaferlinu eru þeir lagðir fyrir þjóðinna í annarri þjóðaratkvæðagreiðslu til samþykktar eða synjunar.

Með þessu er opnuð leið til að fá fram vilja þjóðarinnar óháð flokkslínum og án frekari tafar, að mati Jóns. ,,Þessi leið er einnig í fullu samræmi við þá stefnu sem Guðni Ágústsson, formaður Framsóknarflokksins, hefur boðað."

Guðni sagði í samtali við Vísi í gær að hugmynd þremenninganna hafi hvorki verið rætt í stjórn flokksins né þingflokknum. Þá sagði hann að ákvörðun um stórt mál eins og þetta yrði ekki tekin nema á flokksþingi.