Guðni: Flokksþing ákveður stefnuna í Evrópumálum

Stefna Framsóknarflokksins í Evrópumálum er ákveðin á flokksþingi, segir Guðni Ágústsson formaður Framsóknarflokkins. Hugmynd hóps meðal yngri forystumanna flokksins varðandi kosningar um aðildarviðræður hefur hvorki verið rædd í stjórn flokksins né þingflokknum, að sögn Guðna. ,,Þetta er það stórt mál og stór ákvörðun að hún verður ekki tekin nema að flokksþing komi að henni."

Birkir Jón Jónsson þingmaður, Sæunn Stefánsdóttir ritari Framsóknarflokksins og fyrrverandi þingmaður og Páll Magnússon bæjarritari Kópavogs og fyrrverandi aðstoðarmaður Valgerðar Sverrisdóttur hvetja í grein sem birtist í Fréttablaðinu í gær til þess að efnt verði í seinsta lagi í maí á næsta ári til þjóðaratkvæðagreiðslu um það hvort Íslendingar eigi að hefja aðildarviðræður við Evrópusambandið.

Umræðan um evru og Evrópumál mun reyna meira á alla stjórnmálaflokka á næstu mánuðum, að mati Guðna sem segir að fleiri flokkar en Framsóknarflokkurinn verði að kanna kosti og galla aðildar að Evrópusambandinu.

,,Það er alveg morgunljóst að með stöðu efnahagsmála í miklum ólestri og óðaverðbólgu eins og er á Íslandi og um allan heim þá höfum við enga samningsstöðu í tengslum við Evrópusambandsaðild eða upptöku evru," segir Guðni og bætir við að Framsóknarflokkurinn hafi ályktað um að slíkt gerist ekki í veikleika heldur styrkleika.

Guðni bendir jafnframt á að ekki sé til nein löggjöf um þjóðaratkvæðagreiðslur enda hafi síðast farið fram þjóðaratkvæðagreiðsla við stofnun lýðveldisins. Á næstunni hyggst Framsóknarflokkurinn standa fyrir ráðstefnu með fræðimönnum þar sem farið verður yfir stjórnarskránna og hvernig staðið verður að þjóðaratkvæðagreiðslum í framtíðinni. ,,Nútíminn kallar á að þjóðin sé spurð oftar en verið hefur," segir Guðni.

Í ræðu á miðstjórnarfundi í maí sagði Guðni a gagnlegt væri að spyrja flokksfélaga í póstkosningu út í viðhorfið þeirra til Evrópumálanna. Aðspurður hvort það verði gert segir Guðni: ,,Það hefur ekki verið tekin ákvörðun um það ennþá en það væri mjög fróðlegt að kanna hug flokksmanna á allan hátt. Við höldum áfram að skoða framtíð Íslendinga á öllum sviðum og ræða málin innan flokksins."