Kínverjum sagt hvað ekki má ræða við Olympíufara

Kínversk stjórnvöld hafa hengt upp veggspjöld um alla Beijing borg með fyrirmælum til borgarbúa um þau málefni sem þeir mega alls ekki ræða við gesti og keppendur á komandi Olympíuleikum.

Málefnin sem ekki má ræða um eru átta talsins. Borgarbúar mega alls ekki spyrja olympíufara um launakjör þeirra, á hvaða aldri þeir eru og hvernig ástarlífið gengur. Þá er einnig bannað að ræða um heilsufar viðkomandi, stjórnmálaskoðanir og trúarbrögð svo dæmi séu tekin.

Það er áróðursdeild Dongcheng-hverfisins sem prentað hefur veggspjöldin og látið dreifa þeim um Bejing. Hverfinu tilheyra meðal annars Tiananmen torg og Forboðna borgin.

Talskona deilarinnar segir í samtali við CNN fréttastöðina að veggspjöldum þessum sé ætlað að fræða Kínverja um hvernig eigi að bjóða olympíugestina velkomna á viðunandi hátt. Fyrir utan fyrirmælin um hvað megi ekki ræða eru einnig komin veggspjöld um hvernig eigi að bjóða gestina velkomna. Kínverjar eru meðal annars hvattir til að segja við gestina að þeir séu stórkostlegir og dásamlegir.