Fjöldi flóttamanna frá Írak til Vesturlanda tvöfaldast

Írakar eru stærsti hópur flóttamanna á Vesturlöndunum annað árið í röð. Fjöldi þeirra tvöfaldaðist milli áranna 2006 og 2007.

Samkvæmt tölum frá Flóttamannahjálp Sameinuðu þjóðanna jókst straumur flóttamanna frá Írak til Vesturlandanna úr tæplega 23.000 manns árið 2006 og í 45.000 manns í fyrra.

Hinsvegar er þessi hópur aðeins 1% af þeim 4,5 milljónum Íraka sem neyðst hafa til að yfirgefa heimili sín frá því að stríðið í landinu hófst árið 2003. Um helmingur þessa fjölda hefur flúið til nágrannalanda eins og Jórdan og Sýrlands en helmingur er á vergangi í eign landi.

Flestir þeirra flóttamanna sem komu til Vesturlanda í fyrra vildu setjast að í Bandaríkjunum eða um 15% þeirra. Í öðru sæti er Svíþjóð með 11% af fjöldanum.

Flóttamannahjálpin segir að Evrópubandalagslöndin gætu gert mun meira til að aðstoða þessa flóttamenn en aðeins átta af 27 löndum bandalagsins eru með áætlanir í gangi um að hjálpa þessu fólki.