Obama og McCain hljóta stuðning LA Times

Frambjóðendur forkosninga Demókrata og Repúblíkana keppast nú um suðning þekktra aðila og kjósenda með sjónvarpsauglýsingum fyrir forkosningarnar á „Ofur-þriðjudag" en þá fara fram kosningar í flestum ríkjum Bandaríkjanna. John McCain og Barack Obama hlutu stuðning Los Angeles Times sem er eitt mest lesna dagblað í Bandaríkjunum.

Blaðið lofaði Obama fyrir að vera hvetjandi leiðtoga sem kæmist hjá mannskæðu kosningaþrasi og McCain sem staðfastan íhaldssinna sem væri fylgjandi grundvallar einstaklingshyggju. Þetta er í fyrsta sinn sem blaðið lýsir yfir stuðningi við frambjóðendur til forsetakosninga frá árinu 1972.

Obama hefur einnig hlotið stuðning Stefnumótunarnefndar frjálslyndra í Bandaríkjunum. Á fréttavef CNN segir að um 70 prósent melðimanna sem telja meira en þrjár milljónir, styðji Obama, en 30 prósent Clinton. Verkalýðssamtök starfsmanna í þjónustuiðnaði styður einnig Obama en á vegum þeirra eru 650 þúsund meðlimir.

Spjallþáttadrottningin Oprah Winfrey mun taka þátt í uppákomu á vegum hans í Los Angeles á morgun, tveimur dögum áður en Demókratar í Kaliforníu og 21 öðru ríki ganga til kosninga. Michelle Obama eiginkona hans og Caroline Kennedy munu einnig koma þar fram en forsetaframbjóðandinn sjálfur verður í Delaware.

Hillary Clinton var í Kaliforníu í gær eftir að hafa tekið þátt í rúmlega tíu gervihnattarviðtölum í þeim ríkjum sem kosið verður í á þriðjudag.

Íhaldssami fréttaskýrandinn Ann Coulter lýsti því yfir á fimmtudag að hún væri tilbúin að kjósa Clinton fram yfir McCain ef þau yrðu í úrslitabaráttunni í forsetakosningunum í nóvember. Stuðningsyfirlýsingin kom nokkuð á óvart. Í sjónvarpsviðtali á Fox fréttastöðinni sagði Coulter að McCain væri ekki sannur Repúblíkani.

„Ef þú leitar að því sem hann stendur fyrir og tekur ekki tillit til hvort það stendur R eða D aftan við nafnið hans, ef hann verður frambjóðandi Repúblíkana, þá verður Hillary stelpan okkar, af því að hún er íhaldssamari en hann er," sagði Coulter; „Ég held að hún verði sterkari í stríðinu gegn hryðjuverkum."