Sextíu ára gömul sprengja gerð óvirk í Japan

Um 5.400 íbúar voru fluttir á brott og akvegum lokað á meðan sprengjusérfræðingar japanska hersins gerðu sprengju frá tímum seinni heimsstyrjaldarinnar óvirka í Osaka í vesturhluta Japans í dag.

Sprengjan vegur um eitt tonn og fannst við byggingarframkvæmdir í júní. Áður en sérfræðingarnir réðust til atlögu við gripinn, sem er tæpir tveir metrar á lengd, var jafnvel gert hlé á flugi um flugvöll í nágrenninu og siglingar bannaðar á stóru hafsvæði í kring.

Sprengjan er að öllum líkindum frá Bandaríkjamönnum sem gerðu miklar loftárásir á stærstu borgir Japans í heimsstyrjöldinni. Svipuð sprengja fannst í úthverfi Tókýó í mars og voru 16.000 íbúar fluttir á brott meðan hún var gerð óskaðleg.