McCain vil drepa Írani með sígarettum

Forsetaframbjóðandi Repúblikanaflokksins í Bandaríkjunum, John McCain, lét miður heppileg ummæli falla við blaðamenn í gær þegar hann var spurður út í síaukinn útflutning bandarískra vindlinga til Írans. Sagði McCain að kannski væri þetta ein leið til að drepa Írani.

McCain sá reyndar strax eftir ummælum sínum og sagðist hafa verið að grínast, sérstaklega í ljósi þess að hann væri maður sem hefði ekki reykt vindlinga í næstum þrjá áratugi.

Þetta er ekki í fyrsta sinn sem McCain lætur óheppilegar athugasemdir falla um Íran. Á kosningafundi í Suður-Karólínu í fyrra var hann til dæmis spurður hvort hann hefði uppi áætlanir um að ráðast á Íran. „Þekkið þið ekki gamla Beach Boys lagið Bomb Iran?," svaraði McCain þá um hæl og söng svo: „Bomb bomb bomb, bomb bomb Iran."