Ólympíukyndillinn í Lasa

Hlaupið var með ólympíukyndilinn um götur Lasa, höfuðborgar Tíbets í morgun. Þar kom til blóðugra óeirða í mars síðastliðnum en þær urðu kveikjan að miklum mótmælum víðast hvar þar sem hlaupið hefur verið með kyndilinn.

Kínverjar hafa verið gagnrýndir fyrir slæma meðferð á íbúum í Tíbet en Ólympíuleikarnir verða haldnir í Peking í ágúst. Hlaupið er með kyndilinn tíu kílómetra leið í Tíbet í dag. Lögreglu- og hermenn gæta hlaupaleiðarinnar og þess að ekki komi til mótmæla. Hundrað fimmtíu og sex hlauparar fara með kyndilinn í dag, helmingur þeirra Tíbetar.