Um 75 milljónir í gömlum dönskum 25 eyringum leynast víða

Nálægt 75 milljónum danskra króna í gömlu 25 aura myntinni með gatinu í miðju eru taldar leynast í jakkafóðri, sófum, kommóðuskúffum og á háaloftum um gervalla Danmörku ef marka má framleiðslutölur dönsku myntsláttunnar að frádregnum þeim fjölda sem skilaði sér inn til bankanna þegar hætt var að nota þessa mynt árið 1991. Þetta eru 300 milljónir slíkra 25 eyringa.

Þessi tölfræði var dregin fram í dagsljósið þegar dönsku MS-samtökin hófu styrktarsöfnun sem gengur út á að safna núgildandi 25 aura mynt sem verður aflögð 1. október. Þar er þó ekki um að ræða gataða peninginn góðkunna heldur arftaka hans.

Alls eru í umferð 125 milljónir danskra króna í þeirri mynt og hafa MS-samtökin sett upp 6.000 söfnunarbauka í verslunum víðs vegar um Danmörku til söfnunarinnar. Höfðað er til fólks að gefa þá 25 eyringa sem það á í fórum sínum og rennur það fé sem þannig safnast til MS-samtakanna.

Deildarstjóri hjá samtökunum segir töluvert hafa borið á því að gamla 25 aura myntin með gatinu skili sér í söfnunarbaukana ásamt nýrri peningnum og vitanlega séu þeir fullkomlega gjaldgengir enn þá.

Berlingske Tidende greindi frá.