Hugmyndir Davíðs um þjóðstjórn hafa enga þýðingu

Ágúst Ólafur Ágústsson, varaformaður Samfylkingarinnar, segir ríkisstjórnina ekki sitja með hendur í skauti í því erfiða efnahagsástandi sem nú dynur á þjóðinni. Hann segir hugmyndir Davíðs Oddssonar seðlabankastjóra um þjóðstjórn hugmyndir manns út í bæ sem ekki hafi þýðingu á hinum pólitíska vettvangi.

Fjölmargir aðilar í samfélaginu hafa lýst yfir áhyggjum af efnahagsástandinu og kallað eftir aðgerðum ríkisstjórnarinnar til þess að binda enda á þá óvissu sem ríkir. Bent er á að gengisvísitalan hafi farið yfir 200 stig í gær og það geti leitt til enn meiri verðbólgu sem þýði auknar byrðar á herðar almennings. „Ríkisstjórnin er að leggja sitt af mörkum en allar aðgerðir sem verið er að vinna að eru ekki tilkynntar fyrr en þær eru í höfn," segir Ágúst Ólafur og bætir við að allir séu að gera sitt besta. „Við erum í miðju stormsins og sveiflumst eftir því sem gerist á erlendum mörkuðum en þar er ástandið heldur ekki gott. Það skiptir máli að til lengri tíma eru horfurnar góðar en til skemmri tíma glímum við við erfitt ástand," segir Ágúst.

Aðspurður hvað ríkisstjórnin sé að gera til að forða því að fjöldi manns horfi fram á gjaldþrot bendir Ágúst Ólafur á að ríkisstjórnin hafi í gær kynnt fjárlög með halla þar sem áhersla sé á framkvæmdir á vegum hins opinbera. „Ríkisstjórnin leggur allt kapp á að koma í veg fyrir atvinnuleysi og vandræði hjá fólki en það eru engar töfralausnir til. Vonandi komumst við hratt í gegnum ástandið en við þurfum öll að leggja í púkkið til að svo verði," segir varaformaður Samfylkingarinnar.

Fréttablaðið greinir frá því í morgun að Davíð Oddsson hafi í tvígang viðrað hugmyndir um myndun þjóðstjórnar, annars vegar á fundi bankaráðs Seðlabankans og hins vegar á ríkisstjórnarfundi á þriðjudag. „Þetta kom mér á óvart og þetta hefur ekki verið rætt innan þingflokksins," segir Ágúst Ólafur og gefur lítið fyrir hugmyndina. „Þetta eru vangaveltur manns úti í bæ," segir hann enn fremur.

Þá segir Ágúst Ólafur að ástandið batni ekki með því að hleypa stjórnarandstöðunni í ríkisstjórn. „Helstu hugmyndir Vinstri - grænna eru að segja sig úr EES og Framsókn þarf á hvíld að halda eftir fjölmörg ár í ríkisstjórn. Ég held við höfum bestu ríkisstjórnina í stöðunni, þetta eru tveir stærstu flokkarnir með mikinn þingstyrk sem eru að vinna að því að leysa vandann. Þjóðstjón myndi í raun flækja málin," segir Ágúst Ólafur.

Aðspurður um hvað honum finnist um þessi afskipti embættismannsins Davíðs af stjórnmálum segir Ágúst: „Davíð er bara Davíð og hann má hafa sínar skoðanir en þetta hefur enga þýðingu á hinum pólitíska vettvangi. Þetta undirstrikar bara hversu óheppilegt það er að skipa uppgjafarstjórnmálamenn í stjórn Seðlabankans," segir Ágúst Ólafur.