Enginn tilgangur með þjóðstjórn

„Við erum með ríkisstjórn sem er með mjög styrkan þingmeirihluta og ég sé ekki fyrir mér að þjóðstjórn geti skilað einhverju umfram þá stjórn sem situr í dag," segir Einar Mar Þórðarson stjórnmálafræðingur. Fréttablaðið greinir frá því í dag að tvisvar sinnum á skömmum tíma hafi Davíð Oddsson sagt að ástandið í efnahagsmálum sé svo alvarlegt að hafi einhvern tíma verið ástæða til að koma saman þjóðstjórn hér á landi sé það nú.

Einar Mar tekur ekki undir þessi sjónarmið og bendir á að sú stjórn sem nú sitji hafi mjög styrkan meirihluta, eða 40 þingmenn af 63. „Það væri allt annað ástand ef hér væri mjög veik ríkisstjórn með tæpan meirihluta," segir Einar Mar. Í slíkri stöðu þyrfti ef til vill að koma á þjóðstjórn til að ná samstöðu um ákveðin mál.