Íslendingar urðu vitni að árás Ísraelshers á Nablus

Íslenskir sjálfboðaliðar voru staddir í borginni Nablus á Vesturbakka Palestínu í nótt þegar Ísraelsher réðst inn í miðborgina til þess að loka öllum stofnunum, verslunum, spítölum og fleiru tengdu Hamas-samtökunum. „Þeir komu inn með heila herfylkingu sem ruddist inn í borgina með skothvellum og sprengjuárásum. Við og örugglega flestir aðrir íbúar Nablus gátum ekkert sofið í nótt," segir Yousef Ingi Tamimi, einn íslensku sjálfboðaliðanna í Palestínu.

Yousef hefst við í sjálfboðaliðabúðum ásamt Önnu Tómasdóttur en einn annar Íslendingur er einnig á svipuðum slóðum. Yousef segir að Íslendingarnir hafi ekki verið í neinni lífshættu og hann veit ekki til þess að neinn óbreyttur borgari hafi fallið í árásinni.

Heilli verslunarmiðstöð lokað fyrir litlar sakir

Eins og áður segir var árásinni beint að stofnunum og fleiru tengdu Hamas-samtökunum. Yousef nefnir sem dæmi að heilli verslunarmiðstöð hafi verið lokað og eiganda hennar varpað í steininn vegna mögulegra tengsla við Hamas. Yousef segir þetta koma einkum niður á almennum verslunareigendum í miðstöðinni því þarna er á einu bretti kippt undan þeim fótunum án þess að þeir hafi unnið sér neitt til sakar. „Samkvæmt yfirlýsingu frá hernum verður líka öllum þeim sem koma inn í verslunarmiðstöðina varpað í fangelsi í fimm ár en ég veit ekki hvort þeir láta verða af því," útskýrir Yousef.

Fólk heldur áfram að lifa sínu lífi

Yousef segir að fólk hafi orðið fyrir töluverðu áfalli í kjölfar árásarinnar. „Ísraelsher er hér allar nætur og íbúar hér eru vanir því að herinn komi inn með látum. Þetta er hins vegar með því mesta sem þeir hafa lent í. Fólk heldur samt áfram að lifa lífi sínu enda ekkert annað sem það getur gert."