Írakar krefjast tímaáætlunar um brotthvarf herliðs Bandaríkjanna

Írakar munu ekki skrifa undir neina samninga við Bandaríkjamenn nema þeir gefi upp ákveðna tímaætlun um brotthvarf herliðs síns frá Írak. Þetta er í fyrsta sinn sem svo skýr krafa um tímaáætlun kemur frá stjórnvöldum í Írak. Fréttastofa Reuters greinir frá.

Yfirlýsingin frá Írak kemur í kjölfar ferðar Nuri al-Maliki, forsætisráðherra Írak, til Washington þar sem hann ýjaði fyrst að því að nauðsynlegt væri að hafa áætlun um brotthvarf herliðsins frá Írak í huga í samningaviðræðunum sem nú standa yfir milli þjóðanna tveggja.

Ríkisstjórn Bush Bandaríkjaforseta hefur ítrekað sett sig á móti nákvæmri áætlun um brotthvarf herliðsins og samkvæmt yfirlýsingum frá Hvíta húsinu í dag eru þarlendir ráðamenn enn ekki tilbúnir að fallast á kröfur Íraka um nákvæma tímaáætlun.