Tetródótoxínmaðurinn hafði líftryggt konuna fyrir 5.000.000 dala

Edward F. Bachner, sem handtekinn var í úthverfi Chicago fyrir hálfum mánuði fyrir að hafa í fórum sínum eitrið tetródótoxín, reyndist hafa líftryggt eiginkonu sína fyrir fimm milljónir bandaríkjadala, upphæð sem fallið hefði honum í skaut við fráfall hennar. Bachner var ákærður fyrir handhöfn eitursins í síðustu viku.

Tetródótoxín, sem finnst í ákveðinni tegund ígulkerja, er bráðdrepandi og nægir eitt milligramm af því til að drepa manneskju. Alríkislögreglan FBI handtók Bachner eftir að hann hafði pantað 64 ambúlur af efninu frá efnaframleiðendum í Kaliforníu og New Jersey. Efnið var pantað gegnum Netið og lést Bachner vera læknir þegar hann lagði pantanirnar inn en þeim er heimilt að hafa tetródótoxín í vörslum sínum.

Sérákvæði um hryðjuverk

Líftrygging eiginkonunnar, Rebeccu Bachner, hafði sérákvæði um hryðjuverk sem fólst í því að dæi hún af völdum aðgerða hryðjuverkamanna fengist enn hærri tryggingaupphæð greidd. Rannsakendur málsins hafa nú komist að því að hún hafi átt að vera skotmarkið árið 2005 þegar eiginmaður hennar sendi út tölvupóst þar sem hann óskaði eftir leigumorðingja til að koma í kring „endanlegum starfslokum" hennar eins og það var orðað þar. Ekkert varð þó úr þeirri framkvæmd.

Við leit á heimili Bachners, sem er fjármálaráðgjafi og á hlut í hugbúnaðarfyrirtæki, fundust fölsuð skilríki sem líkjast áttu skilríkjum starfsmanna leyniþjónustunnar CIA, níu millimetra Glock-skammbyssa og 50 hnífar. Af 64 tetródótoxín-ambúlum reyndust 19 horfnar og vildi saksóknari í málinu ekki tjá sig um hvort almenningi gæti mögulega stafað ógn af þeim. Einnig uppgötvaðist bankareikningur með 183.000 bandaríkjadölum, jafnvirði rúmlega 14 milljóna króna, sem eiginkona Bachners hafði ekki vitneskju um.