Fjöldi Dana leitar að framhjáhaldi á netinu

Á stefnumótasíðum á netinu í Danmörku má nú finna 15.000 Dani sem eru í leit að framhjáhaldi. Viðkomandi eru allir giftir eða í sambúð en óska eftir kynlífi utan sambandsins

"Ég er hér til að finna elskuhuga. Þú skalt vera mjög rómantískur því þess sakna ég í lífi mínu". Þannig hljómar auglýsing frá 34 ára gamalli konu frá Norður-Jótlandi á síðunni Sexdating.dk. Hún segist vera gift og fer ekki í felur með það.

Hún er ekki einsdæmi að sögn blaðsins metroXpress sem fjallar um málið í dag. Blaðið ræðir við kynlífsráðgjafa sem segir að fjöldi þeirra sem vilji halda framhjá maka sínum komi sér á óvart.

Hinsvegar er hjónabandsráðgjafinn Martin Östergaard ekki jafn hissa. Hann segir að á síðustu árum hafi hann fengið fjölda af hjónum og pörum til sín sökum þess að samband þeirra var í upplausn eftir að í ljós kom að annar aðilinn var með auglýsingu á stefnumótasíðum.

Östergaard segir að skýringin á þessu sé einkum sú að viðkomandi finnist samband sitt orðið fyrirsjáanlegt og leiðinglegt og er í leit að spennu í líf sínu.

Það fylgir sögunni að mikill meirihluti þeirra sem leitar eftir framhjáhaldi eru karlmenn.