Íran mun svara fullum hálsi verði ráðist á landið

Dirfist Bandaríkjamenn að ráðast á Íran mun landið svara af fullum krafti og ráðast á Tel Aviv og skip Bandaríkjamanna í Persaflóa. Þetta segir Ali Shirazi, einn af nánustu samstarfsmönnum æðsta klerks Írans, Ayatollah Khamenei. Reuters greinir frá þessu.

Mikil pressa hefur verið á Íran frá alþjóðasamfélaginu að landið falli frá kjarnorkuáætlunum sínum en óttast er að landið hyggist smíða sér kjarnavopn. Stjórnvöld í Íran hafa hins vegar þvertekið fyrir allt slíkt og segja tilraunirnar eingöngu ætlaðar fyrir orkubúskap landsins.

Helstu ráðamenn Írans hafa ítrekað sagt að hræðsluáróðurinn sem rekinn hafi verið gegn þarlendum stjórnvöldum sé knúinn áfram af Ísraelsmönnum sem ýti stöðugt á eftir ráðamönnum Bandaríkjanna að herja á Íran. „Ef þeir fremja slík heimskupör munu Tel Aviv og herfloti Bandaríkjamann í Persaflóa verða fyrstu skotmörk Írans og þau munu brenna," var haft eftir Shirazi.

Hvorki stjórnvöld í Ísrael né Bandaríkjunum hafa viljað svarað þessum hótunum en talsmaður Ehuds Olmert, forsætisráðherra Ísraels, sagði að ummæli Shiraz töluðu fyrir sig sjálf.