Misstu sjónina á rússnesku reifi

Tólf ungir Rússar misstu sjónina að hluta eftir að ljósasýning brenndi í þeim augnhimnuna. Staðfest tilfelli eru tólf en rússnesska dagblaðið Kommersant segir að sautján einstaklingar til viðbótar hafi leitað sér aðstoðar vegna málsins.

Ungmennin voru öll gestir á stórri danshátíð, svokölluðu reifi, sem fram fór um 80 kílómetrum fyrir utan Moskvu þann 5. júlí.

Skömmu eftir að hátíðinni lauk fóru nokkur ungmenni að finna fyrir óþægindum og leituðu sér læknisaðstoðar. Þá kom í ljós að ljósasýningin á útihátíðinni hafði ollið bruna á augnhimnu sumra gestanna. Þeir sem brenndust mest misstu allt að 80% sjónarinnar. Læknar segja að sá skaði gangi ekki tilbaka.

Skipuleggjendur danshátíðarinnar segja að vegna mikilla rigninga hafi tjöld verið sett upp yfir ljósasýningunna en það hafi orsakað endurkast.

Ljósunum hafi öryggisins vegna verið beint upp í himinn en ljósgeislarnir hafi hins vegar endurvarpast af tjaldinu og niður aftur í átt að gestum með fyrrgreindum afleiðingum.