Portúgalar kláruðu Tyrki

Portúgalar unnu í kvöld nokkuð öruggan 2-0 sigur á Tyrkjum í síðari leik dagsins á Evrópumótinu í knattspyrnu. Flestir reikna með að Cristiano Ronaldo og félagar fari upp úr A-riðlinum, en þeir kláruðu verkefni sitt í kvöld nokkuð örugglega.

Það var miðvörðurinn spræki Pepe sem kom liðinu yfir eftir klukkutíma leik, en hann hafði áður skorað mark sem dæmt var af vegna rangstöðu.

Cristiano Ronaldo átti skot í stöng úr aukaspyrnu og Nuno Gomes hristi tréverkið í tvígang áður en Raul Meireles innsiglaði sigur Portúgala með marki í uppbótartíma eftir laglega spilamennsku.

Portúgalar og Tékkar eru því með þrjú stig eftir leiki dagsins í A-riðlinum, en heimamenn Svisslendingar og Tyrkir eru án stiga.