Höluðu sig niður í heimsmetabókina

Heimsmetabók Guinness hefur tilkynnt um nýtt heimsmet í niðurhali hugbúnaðar sem sett var 17. júní.

Þann dag opnaði hugbúnaðarframleiðandinn Mozilla fyrir niðurhal netvafrans Firefox 3 og á 24 klukkustundum hlóðu rúmlega átta milljónir netverja vafranum niður. Nánar tiltekið 8.002.530 eintök af Firefox voru sótt á vefsetur Mozilla sem er heimsmet að sögn framkvæmdastjóra heimsmetabókarinnar.

Firefox hefur átt gríðarlegum vinsældum að fagna síðan fyrsta útgáfa hans leit dagsins ljós haustið 2002 og þá undir nafninu Fönix. Ástsæld sína má vafrinn meðal annars þakka öflugum vörnum gegn óvelkomnu auglýsingaskrumi, hraðvirkni og tölvupóstáminni sem tengdur er við tölvupóstþjónustu Google. Einn notandinn skrifar á vefsíðu sína að Firefox sé ekki bara vafri - heldur trúarbrögð.

CNET/News.com greindi frá þessu.