Innlent

Segja lengingu flugbrautar á Akureyri sóun

Húsvíkingar segja að lenging flugbrautar á Akureyri sé sóun, nær væri að byggja upp Húsavíkurflugvöll þar sem flugaðstæður séu miklu betri. Samgönguráðherra segir þessar hugmyndir óraunhæfar.

Í Morgunblaðinu gerir Friðrik Sigurðsson, sveitarstjórnarmaður í Norðurþingi, alvarlegar athugasemdir við forgangsröðun flugsamgöngumannvirkja hér á landi. Hann telur að samgönguráðherra, Kristján Möller, hafi gert mikil mistök með því að láta lengja flugbrautina á Akureyri, með ærnum tilkostnaði.

Enda hafi það margoft verið sannað og síðast fyrir nokkrum dögum að veðurfarsleg skilyrði við Eyjafjörðinn séu vond fyrir flug og að beina hafi þurft millilandaflugi frá Akureyri til Egilsstaða og ferja fólk austur í þriggja tíma rútuferð.

Rétt forgangsröðun að mati Friðriks er að samgönguráðherra láti byggja upp Húsavíkurflugvöll sem stendur verkefnalítill í Aðaldal. Það muni taka Akureyringa aðeins 30 mínútur að aka á alþjóðaflugvöllinn í Aðaldal sem verði alltaf opinn, ólíkt Akureyrarvelli sem liggi með þrönga fjallgarða til beggja hliða og háa fjalltoppa til suðurs. Samgönguráðherra vísar þessari gagnrýni á bug.









Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.