Umfangsmikil björgunaraðgerð í kjölfar SMS-skeytis

Norsk fjölskylda í fríi við strendur Norður-Jótlands í Danmörku setti af stað umfangsmikla björgunaraðgerð með einum SMS-skilaboðum. Faðir með þrjú börn var á siglingu undan ströndinni þegar kastaðist í kekki með honum og syni hans.

Drengurinn sendi móður sinni, sem stödd var í Noregi, SMS-skeyti og tjáði henni að faðir hans lægi dauðadrukkinn á þilfari bátsins. Móðirin hringdi þegar í lögregluna á Jótlandi sem setti björgunaraðgerðir í gang án tafar. Meðal annars var björgunarþyrla send í loftið og stefnt til sjávar.

Fljótlega kom hið sanna þó í ljós, faðirinn var allsgáður með öllu og útkallið gabb eitt. Lögreglu var lítt skemmt yfir þessu tiltæki enda kostar þyrluútkallið 50.000 danskar krónur sem jafnast á við tæpar 800.000 íslenskar krónur. Fólkinu verður þó ekki sendur reikningurinn en drengnum var lesinn pistillinn.

Berlingske Tidende greindi frá þessu og tiltók rækilega að um Norðmenn hefði verið að ræða.