Fjórðungur kínversku þjóðarinnar of feitur

Yfir einn af hverjum fjórum Kínverjum er of þungur samkvæmt nýlegri rannsókn sem hefur verið gerð opinber í blaðinu Health Affairs. Grípi kínversk stjórnvöld ekki strax í taumana mun hlutfallið hækka um helming á næstu áratugum.

Ekki er langt síðan að Kínverjar þóttu með mögrustu þjóðum heimsins en bætt lífskjör, sem hefur meðal annars orsakað fleiri bílferðir og meira sjónvarpsgláp, hafa umbylt fæðumynstri þjóðarinnar. Samkvæmt útreikningum WHO, Heilbrigðisstofnun Sameinuðu þjóðanna, gæti Kína orðið af mörg hundruð milljörðum dala næsta áratuginn vegna fólks sem mun deyja fyrir aldur fram sökum hjartasjúkdóma, heilablóðfalla og sykursýki.

Rannsóknin styður þær röksemdafærslur sem sumir vísindamenn hafi haldið á lofti að offita sé að verða mannkyninu meira vandamál en hungursneyð.