Deilt um dauðan túrista

Ferðamaðurinn var 53 ára gömul kona sem Norður-Kóreumenn segja að hafi farið inn á afgirt bannsvæði snemma á föstudagsmorgun. Þegar varðmaður hafi kallað til hennar hafi hún lagt á flótta í stað þess að koma til hans. Þá hafi hann skotið hana.

Norðanmenn eru illvígir að vanda og neita allri samvinnu um rannsókn á atvikinu. Það sé augljóslega sunnanmönnum einum að kenna.

Í dag bættu þeir svo um betur og neituðu að taka frekari þátt í sáttaferli sem komið var á nokkurn rekspöl.

Talsmaður hins svokallaða Sameiningarráðuneytis í Suður-Kóreu segir að þeir geti enganvegin skilið eða fallist á afstöðu Norður-Kóreu í þessu máli.

Svona atvik sé nokkuð sem þjóðir komi sér saman um rannsókn á, til þess að koma í veg fyrir að það endurtaki sig.

Suður-Kóreskum ferðamönnum hefur verið ráðlagt að fara ekki á staðinn þar sem konan var skotin til bana.