Hvetur til friðsamlegra lausna í Zimbabwe

Kofi Annan, fyrrum aðalritari Sameinuðu Þjóðanna, hvetur leiðtoga Afríkuríkja til að beita sér fyrir friðasamlegri lausn deilnanna í Zimbabwe. Varaði hann við því að ástandið í landinu væri eldfimt og áhrif þess gætu náð út fyrir landamæri þess.

Endurtalning hluta atkvæða í þing- og forsetakosningunum hófst í gær. Það gæti þýtt að stjórnarandstöðuflokkur Morgans Tsvangirais missi meirihlutann á þinginu sem hann vann í þingkosningunum í síðasta mánuði. Úrslit forsetakosninganna hafa enn ekki verið birt og er líklegt að kosið verði á ný milli þeirra Mugabes og Tsvangirais.

Sá síðarnefndi hefur reyndar flúið land þar sem hann óttast um öryggi sitt. Hyggst hann ekki taka þátt í öðrum kosningum nema öryggi hans verði tryggt og alþjóðlegir eftirlitsaðilar fylgist með kosningunum.