Obama: Breytingar hafa knúið dyra

,,Breytingar hafa knúið dyra hjá Bandaríkjamönnum," sagði Barack Obama eftir að ljóst varð að hann yrði 44. forseti Bandaríkjanna með því leggja John Mcain, frambjóðanda repúblikana, að velli í kosningum. Þær marka tímamót því Obama er fyrsti blökkumaðurinn til þess að gegna embættinu.

Talið er að um 130 þúsund manns hafi safnast saman í Grant-garði heimaborg Obama, Chicago, til þess að hlýða á hann ávarpa þjóðina eftir að sigur hans varð ljós. Hann sagði langa vegferð fyrir höndum og að menn myndu ekki endilega ná markmiðum sínum á einu ári eða einu kjörtímabili ,,en ég hef aldrei verið vissari um það en í kvöld að við náum á áfangastað - við sem þjóð munum komast þangað," sagði Obama. Sagðist hann hlakka til að vinna með McCain öldungardeildarþingmanni og varaforsetaefni hans, Söruh Palin, ríkisstjóra Alaska.

Alls hlaut Obama 51 prósent atkvæða en McCain 48 og reyndist munurinn á þeim því nokkru minni en skoðanakannanir gerðu ráð fyrir. Alls kusu um 51,3 milljónir Obama en 47,5 keppinaut hans. Engu að síður hlaut Obama 338 kjörmenn og McCain 156 en 270 kjörmenn þurfti til sigurs.

Demókratar tryggðu sér einnig sigur í kosningum til fulltrúadeildar og öldungadeildar Bandaríkjaþings. Demókratar verða því í meirihluta í báðum deildum.