Ekkert slakað á klónni á Kúbu

Þótt Bandaríkjamenn létu sér fátt um finnast þegar leiðtogaskipti urðu á nágrannaeynni fyrir sunnan þá, gerðu aðrir sér miklar vonir um að Raoul Castro myndi myndi auka frelsi á Kúbu eftir 49 ára harðstjórn Fídels bróður síns.

Ekki bar mikið á því þegar kúbverska þingið kom saman í gær.

Meðal annars höfðu menn vonað að slakað yrði á ferðahömlum.

En Raoul Castro kynnti ekki neinar tilslakanir, heldur sagði íbúunum að búa sig undir enn frekari erfiðleika vegna efnahagslægðarinnar sem nú hrjáir heimsbyggðinga.

Hann gaf líka í skyn að þjóðin ætti að búa sig undir að dregið yrði úr allskonar niðurgreiðslum sem ríkið hefur reitt fram til þess að viðhalda einhverju jafnvægi.

Níutíu prósent af öllum rekstri í landinu er í höndum ríkisins og mánaðarlaun eru um 1500 krónur.

Hið valdalausa þing Kúbu kemur saman í nokkrar klukkustundir tvisvar á ári. Þar er samþykkt allt sem leiðtoginn annaðhvort hefur þegar gert eða hyggst gera.

Eftir þingfundinn í gær er ljóst að ef Kúbverjar ætla að skreppa til útlanda verða þeir áfram að reiða sig á hriplek bátskrifli sem vonandi hanga saman þartil þeir ná ströndum Miami.