Bandaríkjamenn móðga Berlusconi

Bandaríkjastjórn hefur sent frá sér formlega afsökunarbeiðni til Silvio Berlusconi, forsætisráðherra Ítalíu. Ástæðan er sú að í upplýsingapakka frá Bandaríkjastjórn var að finna lýsingu á ævi Berlusconi þar sem hann var sagður „hataður af mörgum". Þessum sérstaka upplýsingapakka var dreift til blaðamanna sem ferðuðust með George W. Bush, Bandaríkjaforseta, til Japans á fund átta helstu iðnríkja heims.

Ekki nóg með það heldur var Berlusconi einnig sagður hafa fengið pólitísk völd sín í gegnum eignarhald sitt á fjölmiðlum og að hann væri „einn umdeildasta leiðtogi í sögu þjóðar sem er þekkt fyrir spillingu og lélegt siðgæði stjórnvalda."

Tony Fratto, talsmaður Hvíta hússins, baðst fljótt afsökunar á mistökunum og sagði að umsögnin endurspeglaði ekki skoðanir Bush forseta, ríkistjórn Bandaríkjanna eða bandarísku þjóðarinnar.

Samskipti Bush og Berlusconi hafa til þessa verið einkar vinsamleg og hefur Berlusconi meðal annars verið nokkuð ötull stuðningsmaður stríðsrekstursins í Írak auk þess sem Berlusconi er einn fárra sem Bush hefur persónulega boðið í heimsókn á búgarð sinn í Texas.

Eitthvað virðist þó hafa slest upp á vinskapinn í kjölfar lýsingarinnar í upplýsingapakkanum því Bush og Berlusconi funduðu ekkert saman á G8-ráðstefnunni í Japan.