Meiðsli Eduardo meðal þeirra verstu í sögunni

Nú þegar er ljóst að meiðslin sem Eduardo Da Silva hlaut í leik Arsenal og Birmingham verður minnst sem einna verstu meiðslanna í sögu breskrar knattspyrnu.

Martin Taylor tæklaði Eduardo það illa að ökklin virtist hreinlega mölbrotinn og að hann hafi hangið saman á skinninu einu.

Atvikið átti sér stað strax á þriðju mínútu leiksins en hlúa þurfti að honum í næstum átta mínútur inn á vellinum. Greinilegt var á viðbrögðum manna inn á vellinum að meiðslin voru sérstaklega slæm.

Ákveðið var strax að sýna ekki hægar endursýningar af atvikinu í sjónvarpinu eins og svo algengt er.

Vísir rifjar hér upp einhver verstu meiðsli síðustu ára í boltanum.

David Busst

Varnarmaður hjá Coventry og lenti saman í árekstri við Denis Irwin, leikmann Manchester United, í apríl árið 1996. Fótbrotnaði það illa að beinið rauf húðina og þurfti sérstaklega að þrífa blóðið af vellinum eftir hann. Peter Schmeichel, markvörður United, þurfti á áfallahjálp að halda eftir að hafa orðið vitni að atvikinu. Busst lék aldrei aftur sem atvinnumaður í knattspyrnu.

Luc Nilis

Belgískur framherji hjá Aston Villa sem meiddist í leik gegn Ipswich í september árið 2000. Hann tvíbrotnaði á fæti er hann lenti í samstuði við markvörð Ipswich og lagði skóna á hilluna í janúar.

Djibril Cisse

Framherji hjá Liverpool sem var tæklaður af James McEvely í október árið 2004. Vinstri fóturinn lagðist saman undir honum með skelflilegum afleiðingum. Búist var við því að hann myndi missa af tímabilinu en hann náði sér fljótt á strik og lék með Liverpool í Meistaradeildinni í apríl.

Hann meiddist svo aftur gríðarlega illa í landsleik með Frakklandi skömmu fyrir HM í Þýskalandi sem hann missti af í kjölfarið.

Henrik Larsson

Framherji hjá Celtic sem tvíbrotnaði í leik gegn Lyon í UEFA-bikarkeppninni í október 1999. John Barnes var stjóri Celtic á þessum tíma og sagði að meiðslin væru ekki jafn slæm og þau litu út fyrir að vera. Legghlíf fór nefnilega úr skorðum sem gerði það að verkum að fótbrotið leit út fyrir að vera mun verra en það var.

Stan Collymore

Framherji hjá Leicester sem fótbrotnaði í leik gegn Derby í apríl árið 2000. Huga þurfti að honum í sex mínútur inn á vellinum og hann þurfti að anda með aðstoð súrefnisgrímu áður en hann var tekinn af velli.

Alan Smith

Framherji Manchester United sem meiddist í bikarleik gegn Liverpool. Hann brotnaði á vinstri fæti og fór úr lið á ökkla eftir að hafa lent illa eftir að hafa reynt að verjast aukaspyrnu frá John Arne Riise. Hann var fluttur á sjúkrahús og var á hliðarlínunni í sjö mánuði í kjölfarið.

Kieron Dyer

Dyer er leikmaður West Ham sem hefur átt við þrálát meiðsli að stríða á ferlinum. Hann varð þó fyrir sínum verstu meiðslum í ágúst síðastliðnum er hann tvíbrotnaði á hægri fæti eftir tæklingu Joe Jacobson, leikmanni Bristol, í ensku deildabikarkeppninni. Hann hefur ekki spilað síðan.