Einn handtekinn vegna hnífstungna í London

Átján ungmenni hafa verið myrt í Lundúnum það sem af er árinu og standa yfirvöld ráðalaus gagnvart morðöldunni.

Lundúnalögreglan handtók í morgun mann í tengslum við rannsókn á morðum tveggja franskra námsmanna í borginni. Tvímenningarnir höfðu verið bundnir og stungnir til bana um síðustu helgi.

Annar hafði fengið um tvö hundruð stungur, hinn um fimmtíu og síðan borinn eldur að líkunum. Ekki hefur verið látið uppi hvort sá handtekni er talinn vera morðinginn.

Hann er 21 árs og var handtekinn á götu skammt frá þar sem morðin voru framin. Átján ungmenni hafa verið myrt í Lundúnum það sem af er árinu og standa yfirvöld ráðalaus gagnvart morðöldunni.

Nýlega var þó ákveðið að skipa nýja 75 manna sérsveit lögreglumanna sem hafa það verkefni að stemma stigu við hnífaburði og ofbeldi meðal ungs fólks, en þau átján ungmenni sem myrt hafa verið á árinu hafa öll verið stungn til bana.