Þúsundir mótmæla fundi G-8 hópsins

Þúsundir manna mótmæltu í morgun fyrirhuguðum leiðtogafundi átta helstu iðnríkja heims sem hefst í Japan eftir helgi.

Himinhátt verð á matvælum og olíu, verðbólga og lánakreppa sem hefur þrýst hagvexti langt niður er meðal þess sem verður á dagskránni þegar leiðtogar átta helstu iðnríkja heims, hinn svokallaði G-8 hópur, hittast utan við Sapporo í Japan eftir helgina.

Útlit og horfur eru miklu verri nú en þegar leiðtogarnir hittust í Þýskalandi fyrir ári síðan. Þá töldu þeir að efnahagsástand heimsins væri í góðu lagi, þótt olíuverð væri að vísu nokkuð hátt. Þá kostaði olíufatið 70 dollara, innan við helming af því sem það kostar nú.

Gestgjafarnir í ár, Japanir, höfðu ætlað umhverfismálum stærstan hluta dagskrárinnar en nú þykir líklegt að efnahagsvandinn muni verða efst á baugi.

En eins og venjulega þegar efnahagsveldin hittast, þá vilja margir koma sínum skoðunum á framfæri með góðu eða illu. Nokkur þúsund manns fóru um götur Sapporo í morgun til að mótmæla fundinum.

Mótmælendurnir veifuðu fánum, börðu bumbur og hrópuðu slagorð gegn G-8 og fundahöldum ríkustu þjóða heimsins. Í hópnum eru umhverfissinnar, andstæðingar heimsvæðingar, dýravinir, stjórnleysingjar og allt þar á milli. Mótmælin voru að mestu friiðsamleg.

Rúmlega 20 þúsund lögreglumenn hafa verið kallaðir út til að tryggja öryggi þjóðarleiðtoganna á Hokkaido-eyju, þar sem Sapporo er, og annar eins fjöldi í höfuðborginni Tokyo.