Ísraelar og Palestínumenn aldrei jafn nærri friði

Þeir Ehud Olmert og Mahmoud Abbas eru báðir í París þar sem þeir sitja ráðstefnu Miðjarðarhafssambandsins svonefnda. Þeir hafa átt bæði tvíhliða viðræður og viðræður við fulltrúa annarra ríkja í Miðausturlöndum.

Ehud Olmert þykir kveða fast að orði þegar hann segir að Ísraelar og Palestínumenn hafi aldrei verið jafn nærri því að setja niður deilur sínar. Mahmoud Abbas segir að báðum aðildum sé mikil alvara og að báðir vilji frið.

Miðjarðarhafssambandið er nýtt ríkjabandalag. Það er óskabarn Nikulásar Sarkozys forseta Frakklands.

Sarkozy ætlaði sér upphaflega að einskorða aðild að sambandinu við ríki sem liggja að Miðjarðarhafinu. Leiðtogar annarra Evrópuríkja gerðust þá nokkuð trylltir, ekki síst Angela Merkel, kanslari Þýskalands sem var ekki á því að leyfa Frökkum að leika einleik í þessum heimshluta.

Niðurstaðan varð sú að 44 lönd eiga nú aðild að sambandinu, þar á meðal öll ríki Evrópusambandsins.