Árekstrarhætta við JFK-flugvöll tvívegis á einni viku

Atvik sem átti sér stað við John F. Kennedy-flugvöllinn í New York í gær hefur vakið spurningar um öryggi flugumferðar við völlinn. Flugmaður Boeing 757-farþegaþotu misreiknaði aðflugshorn sitt og þurfti að fljúga í hring til að gera aðra tilraun. Flaug þotan þá í veg fyrir aðra sem hafði nýhafið sig til flugs.

Talsmaður bandarísku flugmálastjórnarinnar segir vélarnar hafa verið í meira en hálfrar mílu (800 metra) fjarlægð hvor frá annarri auk þess sem þær hafi ekki verið í sömu hæð og flugumferðarstjórar hafi beint vélunum í örugga stefnu.

Flugumferðarstjórarnir sjálfir hafa aðra sögu að segja og halda því fram að fjarlægðin milli vélanna hafi verið innan við 200 metrar þegar hún var minnst.

Þetta er í annað skiptið á einni viku sem atvik af þessu tagi kemur upp en síðastliðinn laugardag varð bilið stutt milli véla sem voru að fara í loftið og lenda. Í því tilviki bárust einnig misvísandi skýrslur um fjarlægð milli vélanna og rannsakar flugmálastjórn nú bæði málin.

CNN greindi frá.