Hillary hugleiðir stöðu sína

Hillary Clinton hugleiðir nú stöðu sína eftir að Barak Obama náði tilskyldum kjörmannafjölda í gærkvöldi til þess að fá útnefningu Demókrata til komandi forsetakosninganna í Bandaríkjunnum.

Hún vildi ekki taka neina ákvörðun í gærkvöldi en sagðist ætla að ráðfæra sig um framhaldið við æðstu menn í Demókrataflokknum. Vangaveltur eru uppi um hvert muni verða næsta skref hennar. Hvort hún sé einfaldlega að bíða eftir rétta tímanum til þess að draga sig til baka eða hvort hún ætli að reyna að sannfæra ofur-kjörmenn Demókrataflokksins um að hún ætti að verða forsetaframbjóðandi þeirra á þeim forsendum að hún hefði fengið fleiri atkvæði en Obama þótt hann hefði fengið fleiri kjörmenn. Þangað til hún hefur enga yfirlýsingu gefið út um að draga sig úr framboðinu er ekki hægt að segja með fullri vissu að Obama verði næsta forsetaefni Demókrata.

Vangaveltur eru einnig um hvort hún sé að reyna að nota áhrif sín til þess að ná varaforsetastólnum en heyrst hefur að Obama sé ekki hrifinn af því að hafa Hillary sem varaforsetaefni.

Talið er að ef svo færi að hún fengi þann stól þá yrði eiginmaður hennar Bill Clinton, fyrrverandi forseti Bandaríkjanna þó líklegast til þess að skyggja á Obama sem forseta. Bill sem þótti í fyrstu styrkja stöðu Hillary í framboðinu þykir nú frekar hafa veikt stöðu hennar. Hann hefur átt það til að missa stjórn á skapi sínu á hinum ýmsu fundum og gagnrýni hans á Obama hefur þótt ómálefnaleg. Hún hefur farið fyrir brjóstið á mörgum kjósendum Demókrataflokksins og þá sérstaklega dökkum kjósendum flokksins en Bill hafði verið vinsæll á meðal þeirra.