Mugabe sleppur fyrir horn -með dálítilli hjálp frá vinum sínum

Refsiaðgerðir Sameinuðu þjóðanna gegn Zimbabwe eru úr sögunni eftir að Rússar og Kínverjar beittu neitunarvaldi Í Öryggisráðinu í gær.

Í aðgerðunum átti meðal annars að felast bann við vopnasölu til Zimbabwe og farbann á Robert Mugabe, forseta, og þrettán af embættismönnum hans.

Níu ríki greiddu atkvæði með refsiaðgerðum en fimm á móti. Neitunarvald Kína og Rússa reið hinsvegar baggamuninn. Meðal ríkja sem greiddu atkvæði gegn tillögunni var Suður-Afríka.

Forseti Suður-Afríku Tambo Mbeki hefur stýrt samningaviðræðum við Zimbabwe og hlotið mikið last fyrir linkind sína. Þeir Robert Mugabe eru góðir vinir.

Kínverjum hefur sjálfsagt runnið blóðið til skyldunnar, því fyrir nokkrum vikum var miklu magni af kínverskum hergögnum landað í Afríkuríkinu. Utanríkisráðherra Kína réttlætti neitun sína með því að refsiaðgerðir myndu aðeins flækja málið.