Krabbameinslæknir varar við farsímanotkun barna

Umræðan um heilsuvernd og farsímanotkun hefur verið rifin upp með hvelli eftir að dr. Ronald B. Herberman við krabbameinsrannsóknarstöðina í Pittsburgh sendi samstarfsfólki sínu pistil um að börn skyldu eingöngu nota farsíma í ýtrustu neyðartilfellum. Þetta útskýrði hann með því að viðkvæm og óþroskuð líffæri þeirra væru einkar viðkvæm fyrir rafsegulbylgjum.

Enn fremur benti Herberman á að fullorðnum væri hollara að nota þráðlausan búnað í stað þess að halda símanum við eyrað eins og mikið var í umræðunni fyrir nokkrum árum. Hann gengur þó mun lengra en það og tekur fólki vara við því að sofa með farsíma sína nálægt sér, svo sem á náttborðum, auk þess sem hann telur ekki ráðlegt að fólk beri símana á sér, nálægt líkamanum, allan daginn.

Dr. Herberman er virtur sérfræðingur á sviði krabbameinsrannsókna og hafa varnaðarorð hans hlotið verðskuldaða athygli, bæði vegna þeirrar staðreyndar og eins þess að kenningar hans stangast á við niðurstöður fjölda rannsókna sem ekki fundu nein tengsl milli krabbameins og farsímanotkunar.

„Upp á síðkastið hef ég fundið töluvert efni sem tengir langtímafarsímanotkun við ýmis áhrif á mannslíkamann, þar á meðal krabbamein," segir Herberman sem lætur engan bilbug á sér finna. „Þrátt fyrir að gögnin séu umdeilanleg er ég sannfærður um að þau nægi til að gefa út almenna viðvörun um að fólk sé meðvitað um hvernig það notar símann," bætir hann við og bendir á að Kent German, starfsbróðir hans sem hefur rannsakað geislun frá farsímum ítarlega, ráðleggi fólki hiklaust að velja sér að minnsta kosti síma með lágu SAR-gildi, en það er mælikvarði á styrk rafsegulsviðsins sem umlykur símann.

CNET greindi frá.