Skemmtistaðir Árósa fara nýjar leiðir í fíkniefnamálum

Skemmtistaðir í Árósum í Danmörku hafa tekið upp nýjar verklagsreglur fyrir fíkniefnamál sem upp koma á stöðunum. Í stað þess að kalla til lögreglu þegar dyraverðir finna fíkniefni á gestum, með tilheyrandi bið og óhagræði fyrir alla aðila, gera dyraverðirnir efnin upptæk. Eigandi efnanna kvittar fyrir þau efni sem af honum eru tekin og efnin ásamt kvittuninni fara svo í læstan skáp á staðnum.

Margir draga væntanlega þá ályktun að slíkt kerfi bjóði upp á misnotkun en lögregla og skemmtistaðaeigendur í Árósum eru í sjöunda himni enn sem komið er enda mikill vinnusparnaður fyrir lögreglu að þurfa ekki að hlaupa til í tíma og ótíma að sinna fíkniefnamálum sem yfirleitt snúast um neysluskammta í stað þess að gæta öryggis borgaranna á öðrum vettvangi.

Málunum lýkur svo með því að lögregla sækir haldlögð fíkniefni á skemmtistaðina og sektar eða boðar eiganda efnanna eftir atvikum.

Berlingske Tidende greindi frá.