Tæknilegir talíbanar í nýrri ímyndarherferð

Talíbanar í Afganistan hafa látið af þeirri fjölmiðlafeimni sem þeir voru áður annálaðir fyrir og beita nú DVD-diskum, SMS-skilaboðum, vefsíðum, tölvupósti og jafnvel hringitónum farsíma til að útbreiða áróður sinn gegn afgönskum og vestrænum óvildarmönnum sínum.

Árin 1996 til 2001 hengdu talíbanar sjónvarpstæki og segulbandsspólur upp í tré til að tákna andúð sína á vestrænum miðlum en þá var öldin önnur er Gaukur bjó á Stöng. Á þeim tíma bjó öll talíbanahreyfingin aðeins yfir einni tölvu.

Þetta breyttist þó allt eftir að sótt var að talíbönum úr öllum áttum í kjölfar 11. september 2001. Lögðust þeir þá í ímyndarvinnu og almannatengsl og útkoman varð samsteypa þeirra miðla sem getið er hér að framan.

Með þessari nýju tækni boða talíbanar fjölmiðlum það sem efst er á baugi hjá þeim auk ýmissa hótana og níðskrifa í garð stjórnvalda. Nýjasta boðleiðin eru svonefnd næturbréf sem borin eru út að nóttu og vara afganskan almenning eindregið við því að starfa á nokkurn hátt með stjórnvöldum eða alþjóðlegum herafla.

Reuters greindi frá.