Enn eitt áfallið fyrir Gordon Brown í aukakosningum

Gordon Brown forsætisráðherra Bretlands varð fyrir enn einu áfallinu í morgun þegar eitt af öruggustu þingsætum Verkamannaflokksins á Bretlandi féll í hendur Skoska þjóðernisflokksins í aukakosningum.

Um var að ræða þingsætið í Glasgow Austur en það hefur verið í höndum Verkamannaflokksins frá því að flokkurinn var stofnaður. Sigur Þjóðernisflokksins var naumur því aðeins munaði 365 atkvæðum á þeim og Verkamannaflokknum. Og kjörsókn var aðeins rúmlega 42%.

Breskir fjölmiðlar segja í morgun að niðurstaðan sé martröð fyrir Gordon Brown. Margaret Curran frambjóðandi Verkamannaflokksins var talin með mjög sterka stöðu í kjördæminu og þar að auki þurfti Skoski þjóðernisflokkurinn að fá 22% sveiflu sér í hag til að ná sætinu miðað við niðurstöður síðustu kosninga. Curran tókst þar að auki að beina kosningabaráttunni að mestu frá málefnum á landsvísu og að staðbundnum málum.

John Mason hinn nýi þingmaður þjóðernissinna segir að sigur sinn sé pólitískur jarðskjálfti af þeirri stærðargráðu að ekki sé hægt að mæla hann á Richter-skalanum. Nú verði Gordon Brown að hlusta á kjósendur í Glasgow Austur.