Hóta frekari refsiaðgerðum gegn Simbabve

Leiðtogar átta helstu iðnríkja heims segja að ef stjórnvöld í Simbabve bregðist ekki við óskum alþjóðasamfélagsins um sættir í landinu í kjölfar forsetakosninga þar verði gripið til frekari refsiðagerða gegn landinu.

Leiðtogarnir funda nú í Japan og á fundi með leiðtogum nokkurra Afríkuríkja í morgun kom fram að þrýst yrði á um skjótar aðgerðir í Simbabve til þess að binda enda óvissuna þar.

Fram hefur komið í fréttum að Robert Mugabe forseti hafi verið lýstur sigurvegari í forsetakosningum sem fram fóru fyrir rúmri viku. Mótframbjóðandi hans, Morgan Tsvangirai, dró framboð sitt til baka vegna þess ofbeldis sem stjórnarandstæðingar sættu í aðdraganda kosninganna. Meðal annars vegna þessa viðurkenna vestrænar þjóðir ekki úrslit kosninganna.