Danski Múhameðsteiknarinn fagnar gæsluvarðhaldsúrskurði

Danski teiknarinn Kurt Westergaard segist ánægður með að Túnismennirnir tveir, sem grunaðir eru um að hafa skipulagt morðtilræði gagnvart honum, sæti gæsluvarðhandi þar til þeir verði sendir aftur til síns heima.

„Ef þeir væru látnir lausir gæti ég átt á þeirri hættu að mæta mögulegum morðingjum mínum á götunni í Árósum. Þeir þekkja mig í sjón, en ég þekki þá ekki," segir Westergaard.

Danska lögreglan segir að Túnismennirnir tveir hafi fylgst með heimili Westergaards og ferðum hans um nokkurt skeið. Þeir voru handteknir þann 12 febrúar síðastliðinn og hafa setið í gæsluvarðhaldi síðan. Héraðsdómur úrskurðaði svo á fimmtudag að þeir skyldu sitja áfram í varðhaldi.

Westergaard segir þó að hann hefði ekki orðið hræddur þótt þeir hefðu verið látnir lausir. „Ég er hættur að vera hræddur - það þýðir ekkert. Ég verð bara að búa við þetta vandamál og ég get það vel," segir Westergaard, sem segist meðvitaður um að lögreglan gæti sín.