Veiddu 76 punda lax

Tveir norskir ellilífeyrisþegar fengu nýverið 76 punda lax á stöng í svo nefndum Breiðuvíkurbotnum og náðu að innbyrða hann í bát sinn. Mörg vitni voru að þessum atburði og sáu þegar laxinn var vigtaður með viðurkenndri vigt.

Það gleymdist hinsvegar að mynda skepnuna áður en hún var send í matvinnslu, og lýsa nú fjölmiðlar víða um heim eftir myndum, sem einhver viðstaddra kynni að hafa tekið af laxinum. Þrátt fyrir myndleysið er ekki efast um veiðisöguna, þar sem vitni þykja áreiðanleg, að sögn norska blaðsins Fiskaren.

Annars hefur laxveiði verið óvenju góð í norskum ám það sem af er sumri og velta þarlendir nú fyrir sér hvort strokulax úr laxeldi kunni að skýra það að hluta.