Ekkert klám á dönskum lögreglustöðvum

Landssamband lögreglumanna í Danmörku hefur nú tekið með öllu fyrir það að myndir og dagatöl með léttklæddum eða nöktum konum prýði veggi danskra lögreglustöðva.

Eins hefur lögreglumönnum verið bannað að heimsækja klámsíður á Netinu í vinnutíma sínum. Þessi ákvörðun var tekin eftir að mótmælaraddir danskra lögreglukvenna urðu æ háværari og að lokum lögðu þær fram formlega kvörtun til sambandsins.

Úrskurðurinn hljómar á þá leið að á stöðvunum skuli ekki sjást myndir sem geti sært blygðunarkennd eða fjalli um málefni sem ekki tengist lögreglustörfum beinlínis eða sýni fólk á einhvern hátt í kynferðislegu ljósi eða virki niðrandi fyrir fólk af öðrum kynþáttum. Slíkar myndir megi. hvorki vera til sýnis fyrir lögreglumenn né viðskiptavini lögreglunnar.