Kæfði eiginkonu og tvö ungabörn

Lögreglan í Pennsylvaníu hefur handtekið 38 ára gamlan mann sem er grunaður um að hafa drepið fyrrverandi eiginkonu sína og tvö börn með því að kæfa þau til dauða.

Maðurinn heitir Orlando Maurice Guariono. Konan hans hét Ashley Guarino. Þau voru nýskilin. Hún var 22 ára gömull. Þau áttu tveggja ára gamla dóttur, Dreux, og ellefu mánaða gamlan son.

Konan og börnin fundust látin á heimili þeirra í morgun. Orlando var handtekinn eftir að hafa verið eltur af lögreglunni í allan dag.

Samkvæmt Miami Herald höfðu Orlando og Ashley átt í deilum síðasta mánuðinn. Hún fór fram á nálgunarbann eftir að Orlando hélt syni þeirra út um gluggan á bíl á ferð til að hræða hana.

Hann á að hafa sagt við hana: "Viltu sjá svolítið klikkað!" áður en hann tók tveggja ára barnið í aðra hendina og renndi niður rúðunni.

Orlando var atvinnulaus en nágrannar hans segja að hann hafi unnið fyrir smápeningum með því að slá gras.