Aðalritari SÞ hvetur Súdan til samvinnu

Ban Ki-moon, aðalritari Sameinuðu þjóðanna (SÞ), hefur hvatt stjórnvöld í Súdan til að vinna með SÞ að öryggi friðargæsluliða og annar sjálfboðaliða í Darfur og ýta þannig undir frið í landinu.

Hvatningin kemur í kjölfar ákæru Alþjóðaglæpadómstólsins í Haag á hendur forseta Súdans, Omar al-Bashir, fyrir þjóðarmorð og glæpi gegn mannkyninu. Stjórnvöld í Khartoum, höfuðborg Súdans, hafa hunsað ákærurnar og segja þær eingöngu gera illt verra fyrir friðarumleitanir.

Ban segir í yfirlýsingu að hann sé mjög vonsvikinn með hversu illa hafi gengið að stilla til friðar í Darfur og að stjórnarherrar Súdans verði að vera samvinnuþýðari.

Nú nýlega þurftu SÞ einmitt að kalla aftur heim tvö hundruð manna lið úr héraðinu sökum mikillar spennu og óróleika meðal stríðandi fylkinga.