Nota netsíður til að fá lyf til fóstureyðinga

Óléttar konur í löndum þar sem fóstureyðingar eru bannaðar eða háðar miklum takmörkunum nota netsíður í auknum mæli til að útvega sér lyf til fóstureyðinga.

Samkvæmt frétt í BBC nota konur á Norður-Írlandi og í 70 öðrum löndum netsíðuna Women on Web til að útvega sér þessi lyf. En þetta er ekki hættulaust. Rannsókn sýnir að um 11% þeirra kvenna sem útvega sér þessi lyf og nota þau þurfa á skurðaðgerð að halda eftir lyfjatökuna. Er það einkum vegna mikilla blæðinga eða þá að lyfjunum tókst ekki að fullkomna fóstureyðinguna.

Forráðmenn netsíðunnar Women on Web segja að lyfin séu aðeins seld til landa þar sem fóstureyðingar eru háðar miklum takmörkunum og aðeins til kvenna sem komnar eru skemur en níu vikur á leið.

Í rannsókninni var haft samband við 400 konur sem fengið höfðu lyf til fóstureyðinga í gegnum netsíður. Ríflega helmingur þeirra svaraði spurningum um málið og í ljós kom að tæplega 60% þeirra voru því þakklátar að geta fengið fóstureyðingu með þessum hætti. Rúmlega 30% fannst þetta óþægileg lífsreynsla og 8% kvennana notuðu ekki lyfin sem þær fengu í hendur.