Blóðbað í Pamplona

Tala slasaðra á sjúkrahúsinu í Pamplona hækkar ört eftir að hið árlega nautahlaup bæjarins hófst í dag.

Reuters fréttastofan greindi fyrst frá því að alls hefðu átta manns slasast alvarlega eftir þeysireið nautanna um bæinn en nú er sú tala komin upp í þrettán manns. Þar af er einn alvarlega slasaður með samanfallið lunga, rifið milta og brotin rifbein. Slasaðir koma víða að, eða allt frá Nýja-Sjálandi og Suður-Afríku til Bretlands og Bandaríkjanna.

Eitt óhapp hefur þó sérstaklega skyggt á hátíðarhöldin í tengslum við nautahlaupið því einn maður lést er hann féll ofan af háum vegg en þar sat hann og fylgdist með hlaupinu.

Nautahlaupið er hluti af hátíðarhöldum í bænum til heiðurs dýrlingnum Fermín og verða hlaupin haldin daglega meðan hátíðin stendur yfir til 14. júlí. Búist er við að flestir verði viðstaddir nautahlaupin um helgina og því má fastlega gera ráð fyrir að tala slasaðra eigi eftir að hækka til muna.