Bandaríkjaher drepur brúðkaupsgesti í Afganistan

Flugárás Bandaríkjahers í Austur-Afganistan á sunnudag varð 47 óbreyttum borgurum að bana, þar af voru 39 þeirra konur og börn. Þetta kom í ljós eftir að sérstakt rannsóknarteymi frá afgönsku ríkisstjórninni fór yfir atburðinn en fyrstu fregnir sögðu að tuttugu skæruliðar hefðu fallið í árásinni.

Nú hefur hins vegar komið í ljós að fórnarlömb árásarinnar voru gestir í brúðkaupsveislu. 47 lágu í valnum og níu aðrir liggja alvarlega slasaðir á sjúkrahúsi.

Stjórnvöld í Afganistan hafa sagt árás Bandaríkjahers algjörlega óásættanlega og krefjast þess að þeir sem beri ábyrgð verði sóttir til saka. Bandaríkjaher hefur nú þegar hafið rannsókn á málinu.

Samkvæmt tölum frá Rauða krossinum á miðvikudag hafa um 250 óbreyttir borgarar fallið í árásum Bandaríkjahers undanfarna daga í Afganistan.