Óttast að milljónir dollara hafi farið til lítils

Aðal sendimaður Sameinuðu þjóðanna í Afganistan segir að nauðsynlegt sé að endurskipuleggja hvernig erlendu hjálparfé er varið þar í landinu og segist óttast að milljónir dollara hafi farið til lítils.

Sendimaðurinn, Kai Eida, sagði í samtali við breska ríkisútvarpið, BBC, að of miklum hluta hjálparfjárins væri varið til að greiða fyrir laun og ýmsan varning í þeim löndum sem legðu peningana til. „Ég tel að við eyðum of miklu í okkar heimalöndum í stað þess að setja peningana í umferð í Afganistan," sagði hann. Eide telur að gjafafénu eigi að veita til verkefna í Afganistan í gegnum afgönsk stjórnvöld.

Í síðasta mánuði hétu 80 ríki því að verja allt að 22 milljörðum dollara, sem samsvarar 1650 milljörðum króna, til uppbyggingarstarfsins í Afganistan. Nú hvetja Sameinuðu þjóðirnar þessi ríki til að standa við stóru orðin og byggja skóla, heilsugæslustöðvar og raforkuver í þágu Afgana sjálfra.